ನಕ್ಷತ್ರದ ಹಂಬಲಿಕೆಗಳು

ಕತ್ತಲುಗಳು ಕುಣಿಯುತ್ತಿವೆ
ನೆತ್ತರವು ಹರಿಯುತ್ತಿದೆ
ಕಾಣದಗಲಕ್ಕೂ ಕೈಚಾಚುತ್ತಿದೆ
ನಕ್ಷತ್ರದ ಹಂಬಲಿಕೆಗಳು
ನೇಣುಗಂಬಗಳಾಗುತ್ತಿವೆ
ಬಣ್ಣದ ಕನಸಿಗೆ, ಆದರ್ಶಕ್ಕೆ
ಧರ್ಮದ ವಿಷಜಂತು ಮುಕ್ಕಿದೆ

ಏಕಲವ್ಯ, ಶಂಬೂಕ,ರೋಹಿತರ
ಪ್ರಜ್ಞೆಗಳು
ವೇದೊತ್ತರದ
ಪ್ರಶ್ನೆಗಳು
ಸುಡುಬಿಸಿಲಿಗೆ ಬೇಯ್ದ ಉರಿಚರ್ಮದ
ಉತ್ತರಗಳು
ಧರ್ಮಕ್ಕೆ,ವೇದಕ್ಕೆ,ಶಾಸ್ತ್ರಗಳ ಬಹಿಷ್ಕಾರಕ್ಕೆ
ಉದರಾಗ್ನಿಯ ಕಿಚ್ಚು ಹತ್ತಿದೆ
ಸಂಕಟಗಳು ಜ್ವಾಲೆಯ ಹೊಯ್ದಾಟದಲಿ
ಉರಿಯುತ್ತಿವೆ
ಕಾಯ್ದ ತಮಟೆಗಳ ಆರ್ಭಟಕ್ಕೆ
ಗುಡಿ ಘಂಟೆಯ ಸಪ್ಪಳ ಮಂಕಾಗಿವೆ

ಹೊಸನಾದ ಹೊಸನುಡಿ
ಹೊಸ ಕನಸ ಕಟ್ಟುವ ಆಶಯಗಳು
ನಕ್ಷತ್ರಗಳಾಗುತ್ತಿವೆ
ಜೋತಿಷ್ಯ ಭವಿಷ್ಯದ ನುಡಿಗಳಾಚೆಗೆ...